Crime (បទល្មើសព្រហ្មទណ្ឌ) គឺជា បទល្មើសប្រឆាំងច្បាប់រដ្ឋ។ ពាក្យនេះ តាមន័យទូទៅបំផុតរបស់វាគឺសំដៅលើគ្រប់បទល្មើសទាំងអស់ ប៉ុន្តែតាមន័យដែលមានកម្រិតជាងនេះទៅទៀតគឺសំដៅលើ បទឧក្រិដ្ឋ។
ពាក្យថា "offense = បទល្មើស" ក៏អាចត្រូវបានគេពិចារណាថា មានន័យដូចគ្នានឹងពាក្យ "crime = បទល្មើសព្រហ្មទណ្ឌ" នេះដែរ ប៉ុន្តែជាទូទៅគេច្រើនតែយល់ថាជា បទល្មើសព្រហ្មទណ្ឌ ដែលតុលាការ "មិនអាចចោទប្រកាន់បាន = is not indictable) ប៉ុន្តែអាចដាក់ទណ្ឌកម្មបាន ដោយការបង់ប្រាក់ផាកពិន័យ។
felony (បទឧក្រិដ្ឋ)៖ បទឧក្រិដ្ឋគឺជា បទល្មើសព្រហ្មទណ្ឌកម្រិតធ្ងន់ (= serious crime) ដែលអាចត្រូវដាក់ទោសឲ្យជាប់ពន្ធនាគារយ៉ាងឆាប់បំផុតមួយឆ្នាំ។ តាមច្បាប់អាពាហ៍និងគ្រួសាររបស់ប្រទេសខ្លះ បទឧក្រិដ្ឋ អាចរាប់បញ្ចូលទាំង បទចាប់ពង្រត់ និងបទរំលោភសិទ្ធិអាណាព្យាបាល (kidnapping and custodial interference)។
ជនទាំងឡាយណាដែលជាប់ទោសឧក្រិដ្ឋនឹងត្រូវបាត់បង់សិទ្ធិមួយចំនួនដូចជា៖ សិទ្ធិបោះឆ្នោត និងសិទ្ធិក្នុងការកាន់មុខតំណែងរដ្ឋ។ នៅក្នុងកំឡុងពេលជាប់ពន្ធនាគារនេះ ជនឧក្រិដ្ឋអាចនឹងត្រូវហាមប្រាមមិនឲ្យចុះកិច្ចសន្យា រៀបអាពាហ៍ពិពាហ៍ ធ្វើការប្ដឹងផ្ដល់ ឬរក្សាអាញ្ញាប័ណ្ណវិជ្ជាជីវៈណាមួយរបស់ខ្លួនឡើយ។ ក្រោយពេលដោះលែងពីពន្ធនាគារ ជននោះចាំបាច់ត្រូវទៅរាយការណ៍ ឬចុះបញ្ជីនៅការិយាល័យនគរបាល។
misdemeanor (បទមជ្ឈឹម)៖ បទមជ្ឈឹមគឺជា បទល្មើសព្រហ្មទណ្ឌ (crime) ដែលជាទូទៅការដាក់ទោសគឺការផាកពិន័យ ឬក៏ការដាក់ទោសឲ្យជាប់ពន្ធនាគាររយៈពេលមិនលើសពីមួយឆ្នាំឡើយ។ ជាទូទៅនៅពេលប្រព្រឹត្តល្មើសលើកទី១ បទល្មើសព្រហ្មទណ្ឌជា បទមជ្ឈឹម នៅពេលប្រព្រឹត្តកំហុសដដែលៗ នឹងក្លាយជា បទឧក្រិដ្ឋ។
បទល្មើសព្រហ្មទណ្ឌទាំងឡាយដែលមិនស្ថិតក្នុងបទឧក្រិដ្ឋទេ គឺជា បទមជ្ឈឹម។
កំណត់សម្គាល់ចំពោះអ្នកអាន៖ ការពន្យល់ខាងលើនេះជា ការបកប្រែទាំងស្រុងពីភាសាអង់គ្លេស មិនមែនជាការដកស្រង់ពីច្បាប់ទេ ហេតុដូច្នេះហើយ ប្រសិនបើ មិត្តអ្នកអាន ឬលោក លោកស្រីដែលមានចំណេះដឹងច្បាស់លាស់ផ្នែកច្បាប់ បានអានការពន្យល់ខាងលើ ព្រមទាំងយល់ថា ការពន្យល់នេះនៅមានចំណុចខ្វះខាត ឬមានចំណុចមិនសមទំនងទេ សូមមេត្តាផ្ដល់យោបល់បន្ថែម ឬកែសម្រួលដល់ខ្ញុំបាទដែលជាអ្នកបកប្រែផង។ ខ្ញុំនឹងរង់ចាំការរិះគន់ស្ថាបនាជានិច្ច។ សូមអរគុណ, សុខា
